Deborah Qaunaq

ᑎᐴᕋ ᐱᓕᕆᕗᖅ ᓴᑯᒃᑎᕆᕗᖅ ᒪᒦᔭᐃᓪᓗᓂ, ᑕᓯᐅᒃᑎᕆᕙᓪᓕᐊᖑᔭᕐᖢᓂᓗ. ᖃᐅᔨᓴᑦᑎᐊᖅᖢᓂ ᐃᒡᓗᒌᒃᑎᑎᕗᖅ ᐊᒥᕐᓂᒃ ᐊᕿᑦᑎᐊᖅᓯᒪᓂᐊᖅᑕᖓᑦᑕ ᑖᒃᓱᒪ ᑲᒥᐅᑉ. ᕿᑐᒻᒪᒃᓴᑦᑎᐊᖅᐸᓪᓕᐊᓪᓗᓂᐅᒃ ᐊᒥᓕᕆᓪᓗᓂᓗ, ᐸᓚᐅᒑᓕᐅᖑᔭᖅᖢᓂᓗ ᐃᒐᐅᑉ ᖄᖓᓐᓂ.

ᐱᓕᕆᖃᑎᒌᒃᖢᑎᒃ, ᑎᐴᕋᒃᑯ ᓗᐃᓴᒃᑯ ᐊᒥᕐᓂ ᕿᑦᑐᒻᒪᒃᓴᐃᕗᑦ, ᑕᓯᐅᒃᑎᕆᓪᓗᑎᒃ ᒪᒦᔭᐃᓗᑎᒡᓗ. ᓱᒃᑲᐃᖦᖢᓂ ᑖᓐᓇ ᕿᑐᒪᖏᑐᐊᓗ ᐊᒥᖅ ᐱᓕᕆᔭᐅᕙᓕᐊᖑᔭᖅᖢᓂ ᕿᑐᒻᒪᒃᐸᓪᓕᐊᕗᖅ. ᐆᓇᔪᒃᑐᕐᒥ ᐃᒪᕐᒥ ᐃᑲᔫᑎᖃᖅᖢᓂ, ᐊᒡᒐᖏ ᒥᓯᒃᑕᖅᐸᓕᐊᖑᔭᖅᖢᓂᒋᑦ, ᐃᓴᒋᓪᓗᓂᔾᔪᒃ ᐱᓕᕆᐊᕆᓗᒍ ᕿᕋᑕᔪᑦ ᐊᒦᑦ, ᐅᔨᖅᓱᑎᐊᕐᖢᑎ ᖃᐅᓯᖅᑎᓗᐊᖅᑕᐃᓕᒪᓪᓗᓂᔾᔪᒃ. ᑑᕆ ᖁᙱᐊᖅᐳᖅ ᑖᒃᑯᓂᖓ ᐱᓕᕆᔪᓂᒃ, ᐱᓕᕆᖃᑕᐅᓕᕆᐊᓚᐅᙱᑎᓪᓗᒍ, ᐃᓕᑉᐸᓕᐊᖑᔭᖅᖢᓂ ᖃᓄ ᐃᒃᐱᖕᓇᕐᒪᑦ ᓴᓇᕐᕈᑏᑦ ᐊᒡᒐᖓᓐᓄ ᓇᖕᒥᓂᖅ ᐊᒥᓕᕆᖃᑕᐅᓯᒋᐊᖅᐳᖅ.

ᑐᑭᓯᐅᒪᓗᒍ ᑖᓐᓇ ᐊᒥᓕᕆᓂᖅ, ᑖᑯᐊ ᐱᖓᓲᑎᓪᓗᒋ ᑲᔪᓯᕗᐃᑦ ᕿᑐᒻᒪᒃᓴᐃᓪᓗᑎᒃ ᑕᓯᐅᒃᑎᕆᐅᔭᖅᖢᑎᒡᓗ ᐊᒥᕐᓂᒃ. ᑎᐴᕋ ᖃᐅᔨᑎᑦᑎᕙᒌᖅᐳᖅ ᖃᓄᖅ ᐱᒻᒪᕆᐅᓂᖓᓄ ᐃᐱᙱᑐᕐᒥᒃ ᑕᓯᐅᒃᑎᕈᑎᖃᕐᓂᖓᓄ, ᐃᐱᒃᑐᐊᓘᔭᕆᐊᖃᖏᖦᖢᓂ, ᐊᒻᒪᓗ ᑕᓯᐅᒃᑎᓗᐊᕌᓗᒋᐊᖃᖏᖦᖢᑎᒃ, ᐱᓗᐃᔭᓗᐊᕌᓗᖤᕐᓂᐊᕐᒪᑦ ᐊᑐᓲᔭᓕᕌᖓᒥᓐ ᑎᐴᕋᐅᑉ ᑲᒻᒥᐅᖃᑕᖅᑐᑐᖃᐅᓯᒪᓂᕆᔭᖓᒍᑦ.

ᓯᕗᓕᖅᐹᒥᑦ ᐆᒃᑐᖅᐸᓕᐊᕗᐃᑦ ᐊᒥᕐᓂᑦ, ᐃᓴᒋᔭᐅᓪᓗᑎᒃ ᐅᓗᒧᑦ ᐱᓚᒃᑕᐅᕙᓪᓕᐊᓪᓗᓂ ᒪᓂᕋᙳᖅᑎᑕᐅᓪᓗᑎᒃ ᑲᑎᒃᑯᑎ ᑲᒥᙳᖅᑎᑕᐅᓇᔭᖅᖢᑎᑦ. ᓗᐃᓴᐅᑉ ᒥᖅᓱᖅᐸᓕᐊᖑᔭᖅᖢᓂᐅ ᑎᐴᕋ ᑖᓐᓇ ᐃᑲᔪᖅᐸᓕᐊᓗᓂ ᐊᕐᕌᒍᑐᖄᓗᖕᓂ ᖃᐅᔨᔾᔪᑎᒋᓯᒪᔭᕐᒥᓂᒃ. ᐃᖏᖃᑎᖃᖅᐳᒍᑦ ᑎᐴᕋ ᐅᓂᑳᖅᐸᓕᐊᖑᔭᖅᖢᓂ ᖃᐅᔨᒪᓂᖓ ᐊᒻᒪᓗ ᖃᐅᔨᒪᓂᖓ ᐱᖁᓯᒃᑯᑦ ᐊᖓᔪᖄᖑᓂᕐᒥᑦ ᐊᒻᒪᓗ ᓂᖏᐅᖑᓂᕐᒥᓗ ᕿᑐᕐᖓᖏᓐᓄᑦ ᐃᕐᖑᑕᖏᓐᓄᓗ.

ᑎᐴᕋ, ᓗᐃᓴ ᑑᕆᓗ ᒥᖅᓱᖅᐸᓪᓕᐊᖏᓐᓇᖅᐳᑦ, ᐃᑲᔪᖅᑎᒌᒃᖢᑎ ᐃᕙᓗᒋᔭᖏᑦ ᓂᒐᕕᑦᑕᕌᖓᑦ, ᕿᓚᔾᔪᔾᔨᔭᕌᖓᑦ ᓄᖑᕈᑎᔭᕌᖓᒥᓗ. ᓗᐃᓴ ᐆᒃᑐᓯᐅᖅᐸᓪᓕᐊᓕᖅᐳᖅ ᕿᕐᓂᖅᑐᓂᒃ ᐊᒥᕐᓂᑦ ᑕᖅᓴᖅᑖᖅᑎᑦᑎᔾᔫᒥᓪᓗᓂ ᑐᒃᑑᑉ ᓂᐅᖏᓐᓂᒃ ᐱᓕᕆᔭᒥᓂᒃ. ᑎᐴᕋ ᕿᓂᖅᐳᑦ ᑎᑭᕐᒥᒃ ᑑᕆᐅᑉ ᓈᒻᒪᒋᔭᖓᓂᒃ.

ᑎᐴᕋ ᐊᑐᖅᖢᓂ ᓴᓇᕐᕈᑎᒥᒃ ᓴᓇᔾᔪᔾᔭᐅᓂᑯᖓᓂᒃ ᓯᓚᑦᑐᕐᓴᕐᕕᖕᒥᒃ, ᑑᕆᒃᑯ ᑎᐴᕋᒃᑯ ᐱᓕᕆᓕᖅᐳᐃ ᕿᑐᒻᒪᒃᓴᐃᕙᓐᓕᐊᓕᖅᖢᑎᒃ ᑐᒃᑑᑉ ᓂᐅᖏᓐᓂᒃ. ᑑᕆ ᖁᙱᐊᖅᑎᖦᖢᒍ ᖃᓄᖅ ᕿᑐᒻᒪᒃᓴᖅᑕᐅᓲᖑᖕᒪᖔᑦ ᐃᒧᓗᒋ, ᓯᕗᓪᓕᕐᒥ ᐊᑕᐅᓯᐅᓕᓗᓂ ᐊᓱᐃᓛ ᐱᖃᑎᖓᖔ ᕿᑐᒻᒪᒃᓴᓚᐅᙱᑐᕐᓗ ᑖᒃᓱᒧᖓ ᕿᑐᒻᒪᒃᓴᐅᑎᐅᑉ ᓴᕕᕋᔭᖏᑦᑎᒍᑦ. ᓗᐃᓴᐅᑉ ᐆᒃᑑᑎᖓ ᐋᖅᑭᒃᐸᓪᓕᐊᓕᖅᐳᖅ, ᐊᓯᔾᔨᖅᐸᓪᓕᐊᓪᓗᓂ ᕿᕐᓂᖅᑐᕐᒥᒃ ᖃᐅᓪᓗᖅᑐᕐᒧᑦ ᑖᒃᑯᐊ ᑐᑦᑑᑉ ᓂᐅᖏᒃ ᐋᖅᑭᒃᐸᓪᓕᐊᓕᖅᖢᑎᒃ ᓴᓇᓗᑎᒃ ᓄᕝᕗᐊᕆᒃᑐᓄᑦ ᐋᖅᑭᒃᓯᒪᓂᖏᓐᓄᑦ.

ᑑᕆ ᐱᒋᐊᓕᖅᐳᖅ ᓇᖕᒥᓂᖅ ᐆᒃᑐᐃᓕᖅᖢᓂ ᑲᒥᖕᓂ, ᓂᕈᐊᖅᖢᓂ ᕿᕐᓂᖅᑐᕐᒥᒃ ᖃᐅᓗᖅᑐᕐᒥᓗ ᑭᐹᕆᒃᑐᓂᒃ ᑕᖅᓴᖃᕐᓂᐊᖅᖢᑎᒃ ᓴᓂᕌᒍᑦ. ᐅᒃᑐᖅᑕᐅᕌᓂᒃᑯᑎᒃ, ᓇᑲᑎᑦᑎᐊᖅᑕᐅᓚᐅᕐᓗᑎᒃ, ᒥᖅᓱᓕᕐᒥᓗᓂᔾᔪᒃ ᑲᑎᑎᑉᐸᓪᓕᐊᓗᒋ, ᑲᑎᙵᔪᓂᒃ ᐆᒃᑐᕐᑕᒥᓂᒃ ᑕᒃᖠᑎᑦᑎᕙᓪᓕᐊᓪᓗᑎᒃ, ᑕᒪᐃᓐᓂ ᐊᑐᓂᒃ ᒥᖅᓱᖅᖢᓂᒋᒃ.

ᕿᓄᐃᓵᖅᖢᑎᒃ, ᑎᐴᕋ, ᓗᐃᓴ ᑑᕆᓗ ᑲᔪᓯᕗᐃ ᒥᖅᓱᖅᖢᑎ ᐆᒃᑐᖅᓯᒪᔪᓂᒃ, ᑕᓯᐅᒃᑎᕆᕙᒃᖢᑎᒃ ᐊᒥᕐᓂᒃ ᐊᒻᒪᓗ ᐃᑲᔪᖅᑎᒌᒃᖢᑎᒃ ᑖᒃᑯᓂᖓᓕᒫ ᐃᓕᕐᓂᑯᓂᒃ ᐊᑐᕆᐊᓕᖕᓂᒃ ᐃᖅᑲᓇᐃᖅᓯᓂᐊᖅᑕᒥᓂᒃ ᐱᐅᔪᕐᓂᒃ ᑲᒦᖕᓂᒃ. ᒥᖅᓲᔭᖅᐳᐃ ᓴᐃᓕᓪᓗᑎᒃ ᓂᐸᐃᑦᑐᕐᒥᒃ, ᐱᙵᓲᑦ ᓴᓇᓕᕆᔩᑦ ᐱᓕᕆᖃᑎᒌᒃᐳᑦ ᐱᙳᖅᑎᑦᑎᓗᑎᒃ ᒪᕐᕉᖕᓂ ᑲᒻᒦᖕᓂᒃ.

ᒥᖅᓱᓯᒋᐊᖅᐳᐃᑦ ᐆᒃᑑᖅᓯᒪᔪᓂᒃ ᑕᕝᕗᖓ, ᑲᑎᑎᑉᐸᓪᓕᐊᓪᓗᒋ ᑖᒃᑯᐊ ᓇᑲᑎᖅᓯᒪᔪᑦ ᐋᖅᑭᒃᐸᓪᓕᐊᓪᓗᓂᒡᔪ ᐊᖏᓛᖓᓐᓄᑦ ᑲᒥᐅᑉ. ᐊᑐᖅᖢᑎᒃ ᕿᑐᒻᒪᒃᓴᐅᑎᓂᒃ ᐊᖏᓛᖅᓯᐅᑎᓂᒃ ᐊᒥᕐᓄᑦ, ᐱᓕᕆᐊᕆᔭᖃᐃᓐᓇᖅᖢᑎᒃ ᑕᒃᑯᓂᖓ ᐊᒥᕐᓂᑦ, ᕿᑐᒻᒪᒃᓴᑦᑎᐊᖅᖢᓂᔾᔪᒃ ᐊᓕᒃᓴᕋᐃᑦᑑᔪᓐᓃᖅᑎᖦᖢᓂᔾᔪᒃ. ᑎᐴᕋ ᖃᐅᔨᒪᔭᕐᒥᓂᒃ ᐅᖃᐅᓯᖃᖅᐳᖅ ᒥᕐᓱᕐᓂᒥᒃ ᐊᑐᖓᓂᒃ, ᑖᒃᑯᐊ ᓴᓇᓯᒪᓪᓗᑎᒃ ᑎᕿᑦᑐᕐᒥ ᓇᑎᕐᒥᒃ.

ᐱᓕᕆᓕᖅᐳᐃ ᐊᑐᙵᓂᑦ, ᐋᕿᒃᑕᐅᓗᑎᒃ, ᓇᑲᑎᖅᑕᐅᓗᑎᒃ ᓈᒪᒋᔭᕐᒥᓄ, ᐊᒻᒪᓗ ᒪᒦᑦ ᐊᕿᒡᓕᓴᐅᑎᓄᑦ ᓴᓇᕈᑎᒧᑦ ᐃᑲᔪᖅᖢᓂ ᐅᖅᓱᕈᔪᐊ ᐲᔭᖅᐹᓕᖅᖢᓂ ᑕᒪᐃᓐᓂ. ᑎᐴᕋ ᐅᔨᖅᓱᑎᐊᖅᖢᓂ ᐊᑦᑐᖓᐅᑉ ᑭᒡᓕᖏ ᒪᒻᒥᔭᖅᐸᐅ, ᒥᖅᓱᖅᑕᐅᓕᕈᑎᒃ ᖃᐅᔨᒪᓂᐅᕐᒪᑕ, ᓈᒻᒪᑎᐊᕐᓂᐊᕐᒪᑦ ᐃᕿᑎᖅᐸᓕᐅᓕᕈᓂᖅ ᒋᒡᓕᐅᒍᑦ.

ᐊᑐᖓᐃᑦ ᒥᖅᓱᖅᑕᐅᓕᖅᖢᑎᒃ ᒪᒥᓄᑦ, ᕿᓄᐃᓵᕐᓇᖅᖢᓂ ᐱᓇᔪᒋᐅᖃᕐᓇᖅᖢᓂᓗ ᒥᖅᓱᑎᐊᕆᐊᖃᕐᓂᖓᓄ ᐆᒃᑐᑲᓂᕆᐊᖃᕐᓂᖓᓄ. ᑎᐴᕋ ᖃᐅᔪᒪᔭᕐᒥᓂ ᑐᓴᖅᑎᑎᕗᖅ ᐊᕐᕌᒍᒐᓵᓗᖕᓂᑦ ᐱᓕᕆᓯᒪᖃᑕᕐᓂᖓᓂᑦ ᑕᒪᑯᐊ ᐱᖁᑎᓂᑦ, ᐃᑲᔪᖅᖢᓂᐅ ᓗᐃᓴ ᐊᒻᒪ ᑑᕆ ᐃᓕᑎᕙᓕᐊᓗᓂᒃ ᐱᕙᓕᐊᓗᑎᒃ.

ᐊᑦᑕᑕᖅᑎᑕᐅᓗᓂ ᐱᐅᓴᖅᓯᒪᓂᖅᓴ ᑲᒥᖕᓄ, ᐋᕿᑎᐊᑲᐅᖅᑐᓕᖅᖢᓂ. ᓛᐃᓴᐅᑉ ᐊᑎᖓᐅᖅᐸᐅ ᖁᕕᐊᓲᑎᒋᓕᖅᖢᓂᔪ ᑕᒪᕐᒥᒃ ᐱᔭᕇᖅᑕᐅᒐᒥ ᐱᐅᔪᐊᓗᖕᓂᑦ ᑲᒦᖕᓂᑦ ᐱᓕᕆᖃᑎᒋᒃᖢᑎᒃ.

ᑲᒥᖏᑦ ᐱᔭᕇᕐᒪᑎᒃ, ᓘᐃᓴ ᑕᖑᕗᖅ ᐊᓕᖅᓯᓕᐅᓯᒋᐊᖅᖢᓂᒃ ᐃᓗᐱᕈᒃᓴᒥᑦ. ᑎᐴᕋ ᐅᖃᓚᒃᐳᖅ ᖃᓄᖅ ᐊᓯᔨᖅᓯᒪᓕᒪᖔᑕ ᒫᓇᐅᔪᖅ, ᐱᖁᑏᑦ ᓴᓇᒃᓴᓕᐅᕆᓇᔭᑐᐃᑦ, ᐊᒻᒪᓗ ᑮᓇᐅᔭᖅ ᑕᐅᑐᖏᓂᑦ ᓄᓇᓕᖏᓂᑦ.

ᑎᐴᕋ ᐊᒍᐃᔪᖅ ᓂᕿᒥᑦ ᐆᔪᓕᐅᕆᓂᐊᖅᑕᒥᖕᓂᑦ, ᓵᓚᐅᖏᓂᕐᓂ ᑑᕆᐊᑉ ᑲᒥᖏᓂ, ᑲᔪᓯᕗᖅ ᒥᖅᓱᖅᖢᓂ, ᓘᐃᓴ ᑖᓇ ᑕᖅᓯᖅᓱᐃᓯᒋᐊᖅᖢᓂ ᐊᓕᖅᓯᒥᖕᓂᑦ. ᑎᐴᕋ ᐊᒻᒪ ᓘᐃᓴ ᐱᐊᓂᒃᓯᓗᑎᒃ ᑲᒦᖕᓂᑦ ᑑᕆᒧᑦ ᐊᑎᖑᐊᓯᒋᐊᖅᐸᖏᑦ ᖃᐅᔨᓗᑎᒃ ᓈᒪᒋᑎᐊᖅᖢᓂᒋᑦ!