ᓴᓇᔩᑦ ᐱᓪᓗᒋᑦ - ᐃᓄᐃᑦ ᓴᓇᔩᑦ
ᓴᓇᔩᑦ ᑕᕐᕆᔮᒃᓴᓕᐅᕈᓯᖏᑦ ᓱᒃᑲᐃᑦᑐᓂᒡᓗ ᓴᖅᑭᔮᖅᑎᑦᑎᕙᖕᓂᖏᑦ ᑕᓚᕖᓴᒃᑯᑦ
ᐱᐊᓂᒃᑕᐅᓚᐅᕐᓯᒪᓪᓗᑎ 2025ᒥ, ᓴᓇᔩᑦ/ᐃᓄᐃᑦ ᓴᓇᔩᑦ ᓯᕗᓪᓕᐅᓪᓗᑎᑦ ᑕᑯᒃᓴᐅᑎᑕᖏᑦ 13-ᖏᕐᓱᕐᖢᑎᑦ (90 ᐃᑲᕐᕋᑦ) ᓴᖅᑭᔮᖅᑎᑦᑎᔾᔪᑕᐅᕗᑦ ᑕᕐᕆᔭᐅᓯᐅᓚᐅᕐᖢᑎᑦ ᓄᓇᕗᒻᒥ ᓄᓇᓕᖕᓂ ᐃᒡᓗᓕᖕᒥ ᐊᕐᕕᐊᓂᓗ, ᐊᒻᒪ ᒪᕐᕉᒃ ᒪᓐᑐᕆᐋᒥ. ᑕᑯᒃᓴᕈᖅᑎᑕᐅᔪᑦ ᐱᖃᓯᐅᔾᔨᕗᑦ 12ᓂ ᐃᓄᖕᓂ ᐊᕐᓇᓂ, ᐊᖑᑎᓂ, ᐃᓐᓇᕐᓂ ᐊᒻᒪ ᒪᒃᑯᒃᑐᓂ ᐃᓄᖕᓂ ‘ᓴᓇᔪᓂᑦ’ - ᓄᓇᖏᓐᓂ ᓴᓇᐅᒐᓕᐊᒥᓂ, ᓴᓈᕐᒥᓂ ᐅᕝᕙᓘᓐᓃᑦ ᖃᐅᔨᒪᔭᒥᓂ.
ᓴᓇᔩᑦ/ᐃᓄᐃᑦ ᓴᓇᔩᑦ ᑕᕐᕆᔮᒃᓴᓕᐊᖑᓚᐅᖅᐳᑦ “ᓱᒃᑲᐃᑦᑐᓂ ᓴᖅᑭᔮᖅᑐᓂ” ᐊᑐᕐᖢᑎᑦ ᖁᓐᖏᐊᖅᑐᑦ ᖁᓐᖏᐊᑦᑎᐊᒃᑲᓐᓂᕐᓂᕐᓴᐅᔪᓐᓇᖁᓪᓗᒋᑦ. ᐱᕙᓪᓕᐊᓂᐅᕙᓚᐅᖅᑐᑦ ᒪᓖᓐᓇᕐᖢᑎᒍᑦ, ᐃᓄᐃᑦ ᐃᓅᓯᕆᕙᒃᑕᖏᓐᓂ ᐱᓕᕆᐊᕆᕙᒃᑕᖏᓐᓂᒡᓗ ᓴᖅᑭᑎᑦᑎᕙᓪᓕᐊᖏᓐᓇᕋᓱᓚᐅᖅᐳᒍᓐ. ᐊᔾᔨᓕᐅᕈᑎ ᑖᖅᑯᑦᑎᐅᔾᔨᑦᑕᐃᓕᒪᓇᓱᒃᐸᒃᖢᒍ ᖁᓐᖏᐊᕈᑎᑦᑎᐊᕙᐅᑎᓐᓇᓱᒃᖢᒍᓗ, ᑕᒪᐃᓐᓂ ᓱᒃᑲᐃᑦᑐᓂ ᐱᕐᔪᐊᖅᑐᓂᒡᓗ ᑕᒡᕙᓐᖓᑦᑕᐃᓐᓇᖅ ᓴᖅᑭᔮᖅᑎᑦᑎᔾᔪᑎᒋᓇᓱᒃᖢᒋᑦ, ᖁᓐᖏᐊᖅᑐᑦ ᓇᖕᒥᓂᖅ ᑕᑯᕙᓪᓕᐊᔭᒥᓂ ᐃᓱᒪᓕᐅᕈᓐᓇᖁᓪᓗᒋᑦ.
ᐃᒪᓐᓇ ᑕᒡᕙ ᐃᓄᐃᑦ ᓴᓇᕙᒃᐳᓐ. ᐅᕙᒍᑦ ᖁᓐᖏᐊᖅᑐᑎᒍᑦ ᐃᒃᓯᕚᖑᔭᕐᖢᑕ ᑭᐱᓐᖑᐃᔭᖃᑎᒋᕙᒃᐸᕗᓐ.
ᐃᓄᐃᑦ ᐃᓅᓯᖏᓐᓂ ᐃᒃᐱᒍᓱᑦᑎᐊᕐᖢᑎᑦ ᖁᓐᖏᐊᖅᑎᑦᑎᔾᔪᓯᖅᑕᖃᒃᑲᓐᓂᓐᖏᓚᖅ ᐃᓱᒪᒃᑯᑦ ᓱᒃᑯᐃᑦᑐᓂ ᓴᖅᑭᔮᖅᑎᑦᑎᖃᑦᑕᕈᓯᖏᓐᓂ
ᓯᕗᓪᓕᕐᒥ ᓴᓇᔩᑦ ᑕᕐᕆᔮᒃᓴᓕᐊᑦ 13ᖑᓂᐊᓚᐅᖅᐳᑦ, ᑕᒪᐃᓐᓂ ᑕᓪᓕᒪᐅᔪᑦ ᐃᑲᕐᕋᒥ ᐊᑕᐅᓯᕐᒥ ᐊᑯᓂᐅᓂᖃᕐᖢᑎᑦ. ᑭᓯᐊᓂ ᑕᒪᕐᒥᑦᑎᐊᖅ ᐊᓯᔾᔨᕈᒪᓕᓚᐅᖅᐸᕗᑦ ᓯᕗᓪᓕᖅᐹᒥᒃ ᑕᕐᕆᔭᐅᓯᐅᖅᑎᓪᓗᑕ, ᐃᓄᖕᒥᒃ ᓴᓇᐅᒐᓕᐅᖅᑐᒥᒃ. ᑖᓐᓇ ᓴᓇᐅᒐᓕᐅᖅᑐᖅ ᖁᓐᖏᐊᖑᔭᕐᖢᑎᒍᑦ, ᖃᐅᔨᓕᓚᐅᖅᐳᒍᑦ ᓱᒃᑲᐃᑦᑐᒥ ᑕᕐᕆᔭᐅᓯᐅᕈᓯᕐᒥ ᐊᑐᕈᑦᑕ - ᓴᓇᐅᒐᓕᐅᕐᓂᖓ ᒪᓖᓐᓇᕐᓗᒍ ᓇᑲᑎᕐᓱᓗᐊᖅᑕᐃᓕᒪᓗᒍᓗ - ᐱᓪᓚᑦᑖᖑᖅᑰᔨᓂᕐᓴᐅᑎᓪᓗᒍ. ᑕᐃᒪᐃᒃᑯᑎᓐ, ᖁᓐᖏᐊᖅᑐᓐ ᓴᓇᔭᐅᔪᑐᐃᓐᓇᕐᓂ ᑕᑯᑎᑐᐃᓐᓇᕐᓗᒋᐅᓐᖏᑦᑐᖅ; ᐃᒃᐱᒋᒻᒪᕆᒃᖢᓂᔾᔪᒃ ᓴᓇᐅᒐᓕᐅᖅᑐᑦ ᐃᓕᖅᑯᓯᕆᔭᖓᓐᓂᒃ ᒪᓕᒍᓐᓇᖁᓪᓗᒋᑦ ᓄᖅᑲᖅᑕᑲᑕᒃᑎᑕᐅᓐᖏᓪᓗᑎᑦ ᓇᑲᑎᕆᔾᔪᓯᐅᒐᔪᒃᑐᓄᑦ.
ᓴᓇᔩᑦ ᑕᕐᕆᔮᒃᓴᓕᐊᑦ ᓱᒃᑲᐃᑦᑑᓪᓗᑎᑦ ᖁᓐᖏᐊᖅᑕᐅᔪᓐᓇᖅᐳᑦ ᖁᓐᖏᐊᖅᑐᑦ ᓲᕐᓗ ᑕᒡᕙᓂᓪᓚᑦᑖᖅ ᐃᒃᐱᒍᓱᒍᓐᓇᖁᓪᓗᒋᑦ - ᐃᓅᑉ ᓴᓇᐅᒐᓕᐅᖅᑑᑉ ᓴᓇᕙᓪᓕᐊᔭᖓᓂ ᐅᓪᓗᓄ ᖃᔅᓯᓄ ᒪᓕᒃᑕᐅᖏᓐᓇᕐᖢᑎᑦ, ᐅᕝᕙᓘᓐᓃᑦ ᐃᖃᓪᓕᐊᕐᓯᒪᔪᓃᖦᖢᑎᑦ. ᐱᕙᓪᓕᐊᔪᑦ ᒪᓕᒃᖢᒋᑦ ᑕᕐᕆᔭᒐᓕᐅᖅᐸᓪᓕᐊᓂᖅ ᐊᑐᖅᐸᒃᖢᑎᒍᑦ, ᓴᓇᔭᐅᒃᓲᔭᖅᐸᖕᓂᖏᓐᓄ ᒪᓕᒍᑎᒋᓇᓱᑦᑎᐊᖅᐸᒃᐸᕗᑦ ᐃᓄᐃᑦ ᐃᓅᓯᖏᓐᓄᑦ ᐱᓕᕆᐊᖏᓐᓄᓪᓗ. ᐊᔾᔨᓕᐅᕈᑦ ᖁᓐᖏᐊᑦᑎᐊᕈᑎᒃᓴᐅᕗᖅ, ᓴᖅᑭᑎᑦᑎᔾᔪᑕᐅᕙᓪᓕᐊᓪᓗᓂ ᐱᕙᓪᓕᐊᒃᓲᔭᖅᑐᓂ ᐱᒻᒪᕆᐅᔪᓂᒡᓗ ᑕᒪᐃᓐᓂ ᐊᑕᐅᑦᑎᒃᑯᑦ ᐱᕐᔪᐊᓐᖑᖅᑎᕈᑕᐅᓪᓗᓂ, ᖁᓐᖏᐊᖅᑐᑦ ᓇᖕᒥᓂᖅ ᐃᓱᒪᓕᐅᕈᓐᓇᖁᓪᓗᒋᑦ.
ᓴᓇᔩᑦ ᑕᕐᕆᔮᒃᓴᓕᐊᖑᕗᑦ ᐱᖓᓱᓂ ᓴᓇᐅᒐᓕᐅᕈᓯᓂ ᐊᑐᕐᖢᑎᑦ: ᓯᕗᓪᓕᑦ, ᓄᐊᕐᒪᓐ ᑳᓐ ᑕᕐᕆᔮᒃᓴᓕᐅᕈᓯᖏᓐᓂ ᑕᐃᒪᓐᖓᑦ 1970ᓂ, ᑕᕐᕆᔮᒃᓴᓕᐅᕈᓯᖓᓐᓂ ᐊᔾᔨᓕᐅᕐᓯᔾᔪᓯᖓᓐᓂᒡᓗ ᐊᑐᕈᑕᐅᓪᓗᓂ. ᐱᖃᑎᖏᑦ, ᓴᖅᑲᓕᐊᓯ ᑯᓄᒃ (ᑕᕐᕆᔮᒃᓴᓕᐅᖅᑎ ᐊᒻᒪ ᓴᖅᑭᑎᑦᑎᖃᑕᐅᓂᑯ ᐃᒡᓗᓕᖕᒥ ᐃᓱᒪᒃᑯᑦ ᑕᕐᕆᔮᒃᓴᓕᐅᖅᑎᖏᓐᓂ ᐊᒻᒪ ᑭᖑᓪᓖᑦ ᑕᕐᕆᔮᒃᓴᓕᐅᖅᑎᖏᓐᓂ) ᑕᕐᕆᔮᒃᓴᓕᐅᕈᓯᖓᓐᓂᒃ, ᐊᒻᒪ ᓄᐊᕐᒪᓐ ᑳᓐ (ᓴᖅᑭᑎᑦᑎᖃᑕᐅᓂᑯ ᐃᒡᓗᓕᖕᒥ ᐃᓱᒪᒃᑯᑦ ᑕᕐᕆᔮᒃᓴᓕᐅᖅᑎᖏᓐᓂ ᐊᒻᒪ ᑭᖑᓪᓖᑦ ᑕᕐᕆᔮᒃᓴᓕᐅᖅᑎᖏᓐᓂ). ᑕᐃᒪᓐᖓᑦ 1990ᒥ ᖃᐅᔨᓇᓱᒃᓯᒪᕘᒃ ᖃᓄᖅ ᐃᓄᐃᑦ ᐃᓕᖅᑯᓯᖏᓐᓂ ᑕᐃᒪᓐᓇᓗ ᑕᕐᕆᔮᒃᓴᓕᐅᕈᓯᕐᓂ ᐊᒥᓱᓂ ᓱᓕᔪᓂ ᑕᕐᕆᔭᐅᓯᓕᐅᖃᑦᑕᕐᓂᒃᑯᑦ, ᓇᐃᑦᑐᓂ ᑕᕐᕆᔭᐅᓯᓕᐅᕐᓂᒃᑯᑦ ᐊᒻᒪ ᑕᕐᕆᔮᒃᓴᓪᓚᕆᓕᐅᖃᑦᑕᕐᓂᒃᑯᑦ ᐊᕐᕌᒍᓄ 30ᓄ. ᐊᒻᒪ ᑭᖑᓪᓕᕐᒥ, ᓱᒃᑲᐃᑦᑐᓂ ᑕᕐᕆᔮᒃᓴᓕᐅᖅᐸᖁᖕᓂᖅ ᐊᑐᖅᑕᐅᕙᓕᖅᑎᓪᓗᒍ ᓄᐊᕐᕙᐃᒥ ᑑᒪᓯ ᕼᐃᓚᒻ 2009ᒥ ᑕᕐᕆᔮᒃᓴᓕᐅᓚᐅᕐᓯᒪᑎᓪᓗᒍ 7ᓄ ᐃᑲᕐᕋᓄ ᓄᓇᒃᑰᕈᑎᑯᑖᒡᔪᐊᒃᑯᑦ ᐃᖏᕐᕋᔪᓂ, ᓴᖅᑭᑎᑦᑎᓪᓗᐊᑕᕋᓱᒃᖢᓂ ᐱᔭᕆᑭᓐᓂᖓᓂ, ᐱᓪᓚᑦᑖᕐᓂᖓᓂᒡᓗ. ᑕᐃᒪᓐᖓ ᑕᕐᕆᔭᐅᓯᐅᕐᓗᓂ ᓲᕐᓗ ᐃᓕᓐᓂᐊᑦᑎᐊᕐᓇᕐᒪᓐ ᑕᒡᕙᓃᓪᓚᑦᑖᖅᑰᔨᓐᓇᕐᖢᓂᓗ ᑕᕐᕆᔭᖅᑐᓄᑦ - ᐃᓕᖅᑯᓯᑐᖃᖃᑕᐅᓐᖏᑦᑑᒐᓗᐊᕐᓄ ᑐᑭᓯᓇᑦᑎᐊᒃᑲᓐᓂᕈᑕᐅᓐᓇᕐᖢᓂ ᐊᓯᖏᑕᓗ ᐃᓕᖅᑯᓯᑐᖃᖏᓐᓂ ᖃᐅᔨᕚᓪᓕᒃᑲᓐᓂᕈᑎᒋᔪᓐᓇᕐᖢᓂᔾᔪᒃ.
ᑲᐃᕈᓪ ᑯᓄᒃ ᑕᐃᒪᓐᖓᑦ 1990ᓂ ᓴᖅᑲᓕᐊᓯ ᑯᓄᖕᒥᒃ ᐱᓕᕆᐊᖃᖃᑎᖃᕐᓯᒪᓕᖅᐳᖅ, ᑕᕐᕆᔮᒃᓴᓕᐅᕐᖢᑎᒃ ᐊᔾᔨᓕᐅᕆᓪᓗᑎᒡᓗ. ᑭᖑᓂᐊᒍᑦ ᐱᓕᒻᒪᒃᓴᐃᑎᑦᑎᓕᓚᐅᖅᐳᖅ ᒫᒃ ᔫᓂᐊ ᒪᓕᑭᒥᒃ ᐱᕙᓪᓕᐊᔪᓂ ᒪᓕᑦᑎᐊᕐᓂᒃᑯᑦ ᖁᓐᖏᐊᑦᑎᐊᕐᓂᒃᑯᓪᓕ ᐊᔾᔨᓕᐅᕆᕙᓪᓕᐊᓂᕐᒥᒃ. ᒑᑉᕆᐊᓚ ᒍᒪᔅ ᐱᓕᕆᖃᑎᖃᕐᓯᒪᕗᖅ ᓄᐊᕐᒪᓐ ᑳᓐᒥᒃ ᑕᐃᒪᓐᖓᑦ 2006ᒥ, ᑕᕐᕆᔮᒃᓴᓕᐅᕐᖢᑎᒃ ᐊᑕᐅᓯᐅᓐᖏᑦᑐᓂ, ᓄᑖᓂ ᑕᕐᕆᔮᒃᓴᓕᐅᕈᓯᕐᓂ ᐃᓱᒪ.ᑕᕐᕆᔭᒐᓕᐊᓄᑦ. ᔨᓕᐊᓐ ᕌᐱᓐᓴᓐ ᑕᐃᒪᓐᖓᓂ 1980ᓂ ᓄᐊᕐᒪᓐ ᑳᓐᒥᒃ ᐱᓕᕆᐊᖃᖃᑎᖃᕐᓯᓴᕗᖅ ᐊᔾᔨᒌᓐᖏᑦᑐᓂ ᑕᕐᕆᔮᒐᓕᐅᕈᓯᕐᓂ.
ᑲᒪᓇᕐᓚᒃᐳᖅ ᐋᖅᑭᒃᓱᐃᔾᔪᓯᐅᔪᓐᓇᖅᑐᑦ ᐃᓱᒪᒃᑯᑦ ᑕᕐᕆᔭᐅᓯᐊᕆᕙᒃᑕᖏᑦ ᓱᒃᑲᐃᑦᑐᓂᒡᓗ ᖁᓐᖏᐊᖅᑎᑦᑎᔾᔪᑎᑦ ᑕᓚᕖᓴᒃᑯᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐅᑭᐅᖅᑕᖅᑐᒥᓗ ᐱᓪᓚᑦᑖᖅᑐᑦ ᐃᓱᒪᒋᓪᓗᒋᑦ. ᑭᓱᓕᒫᓄ ᐊᓯᓐᖑᕈᑕᐅᓚᐅᖅᐳᑦ ᐅᕙᖓ ᐃᓱᒪᒋᔭᖓᒍᑦ ᑐᑭᓯᔪᓐᓇᕐᓯᔾᔫᒥᓪᓗᖓ ᐃᓄᐃᑦ ᒥᑕᐅᓯᖏᓐᓂ, ᐃᓄᒃᑎᑐᑦ ᐅᖃᐅᓯᖓᑦ ᐋᖅᑭᐅᒪᓂᖓᓄᑦ, ᐊᕐᕌᒍᖃᖃᑎᒌᓐᖏᑦᑑᑕᐅᔪᓪᓗ ᑐᑭᓯᐅᒪᖃᑎᒌᒍᓯᖏᑦ ᐃᓱᒪᒋᓪᓗᒋᑦ, ᖃᐅᔨᕚᓪᓕᖅᐳᖓ ᑭᓱᑐᐃᓐᓇᖅ
ᓴᓇᔭᐅᕙᖕᓂᖏᓐᓄᑦ…ᐃᓚᐅᓂᖃᑦᑎᐊᕐᓇᕐᓂᕐᓴᐅᓪᓗᓂ, ᓴᓇᔭᐅᕙᓪᓕᐊᔪᑦ ᓴᖅᑭᑉᐸᓪᓕᐊᔾᔪᓯᖏᑦ ᑲᒪᓇᖅᑐᐊᓘᓗᐊᕈᓐᓃᕐᖢᑎᖅ…ᐊᒃᓱᕈᓐᖏᐅᔭᕐᖢᖓ ᖁᓐᖏᐊᖑᔭᕈᓐᓇᕐᓯᕗᖓ ᖁᓐᖏᐊᖅᑕᒃᑲᓗ ᐃᓄᖏᑦ ᐃᓅᖃᑎᒋᑦᑎᐊᕐᓂᕐᓴᐅᖅᑰᔨᓪᓗᒋᑦ, ᐃᖕᒥᓂ ᐃᓂᒋᔭᖏᑦ ᐱᕕᖃᖅᑎᓐᓂᖏᓪᓗ ᒪᓕᑦᑎᐊᕐᖢᒋᑦ…ᐊᒻᒪ ᐅᖃᖅᑕᖏᑦ ᓴᖅᑭᓐᓇᔭᓚᐅᓐᖏᑦᑐᑦ ᑕᕐᕆᔭᐅᓯᓕᐅᕈᑕᐅᒐᔪᒃᑐᓂ ᓱᓕᓪᓚᕆᖕᓂᕐᓴᐅᓕᕈᑕᐅᕙᒃᐳᑦ, ᖁᓐᖏᐅᖅᑕᐅᒐᒃᓴᓕᐅᑐᐃᓐᓇᕋᑎᒃ. ᖃᓄᑐᐃᓐᓇᖅ ᐊᔪᕐᓇᕈᓐᓃᖅᐳᑦ. ᐱᕕᖃᖅᑎᑕᐅᓂᖅ ᑲᔾᔮᕐᓇᕐᓂᕐᓴᐅᓕᕐᖢᓂ.
ᑖᒃᑯᐊ ᑎᓴᒪᐃᑦ ᓴᓇᔩᑦᑯᓐᓂ ᖁᓐᖏᐊᒐᒃᓴᓕᐅᖅᑎᑦ ᑕᐃᒪᓐᓇ ᑕᕐᕆᔮᒃᓴᓕᐅᕈᓯᖃᕈᒪᓕᓚᐅᖅᐳᑦ ᓱᒃᑲᐃᑦᑐᓂᒡᓗ ᓴᖅᑭᑎᒐᒃᓴᓕᐅᕈᓯᕐᓂ ᐊᑐᕐᓗᑎᑦ, ᐱᓪᓚᑦᑖᖅᑰᔨᓐᓇᕐᓂᕐᓴᐅᖕᒪᓐ ᐃᓄᐃᑦ ᐃᓅᓯᖏᓐᓂ ᓴᖅᑭᑎᑦᑎᔭᕆᐊᒃᓴᖅ, ᓴᓇᐅᒐᖏᓐᓂ, ᒥᑕᐅᑎᖃᕈᓯᖏᓐᓂ, ᐅᖃᐅᓯᖏᓐᓂ, ᐊᒻᒪ ᐃᓚᒌᒍᓯᖏᓐᓂ. ᖃᐅᔨᖕᒪᑕ ᓱᒃᑲᐃᑦᑐᓂ ᐊᔾᔨᓕᐅᕆᓪᓗᓂ ᐱᓪᓚᑦᑖᕐᓇᕐᓂᕐᓴᐅᓂᖓᓄᑦ ᐅᓂᒃᑳᖅᑐᐊᕈᓯᕐᓂ, ᖁᓐᖏᐊᖅᑐᑦ ᐃᓱᒪᓕᐅᕈᓐᓇᕐᓯᓪᓗᑎᑦ ᑭᓱᓂ ᐱᒻᒪᕆᐅᑎᑦᑎᓂᖏᓐᓄᑦ ᐊᑕᐅᑦᑎᒃᑯᓪᓗ ᓱᒃᑲᒃᓯᑎᑕᐅᓇᒋᑦ ᐱᕕᒃᑐᑦ, ᐃᓂᒋᔭᖏᑦ ᐊᒻᒪ ᐃᓕᖅᑯᓯᕆᔭᖏᑦ. ᑕᕝᕗᖓᑦᑎᐊᖅ ᖁᓐᖏᐊᕈᓐᓇᖅᑎᑕᐅᑎᓪᓗᒋᑦ ᒪᓕᒍᑕᐅᓂᕐᓴᐅᔪᓐᓇᕐᒪᑦ ᐃᓄᐃᑦ ᐃᓅᓯᖏᓐᓄᑦ ᖁᓐᖏᐊᖅᑐᓪᓗ ᑕᒡᕙᓃᖃᑕᐅᖅᑰᔨᓂᕐᓴᐅᓕᕐᖢᑎᑦ. ᓄᓇᕐᔪᐊᕐᒥ ᑭᓱᓕᒫᑦ ᓱᒃᑲᓴᐃᓐᓇᐅᔭᓕᖅᑎᓪᓗᒋᑦ ᐱᕕᐅᒐᓗᐊᓪᓗ ᑐᐊᕕᕐᓴᖅᑕᐅᖏᓐᓇᐅᔭᓕᖅᑎᓪᓗᒋᑦ, ᑕᐃᒪᓐᓇ ᐊᔾᔨᓕᐅᕆᔾᔪᓯᑐᖃᕐᓂ ᒪᓕᓐᖏᓐᓂᐅᔪᖅ ‘ᓱᒃᑲᐃᑦᑐᓂ ᓴᖅᑭᔮᖅᑎᑦᑎᓂᖅ’ ᓄᑖᖑᓂᕐᓴᐅᕗᖅ, ᖁᓐᖏᐊᖅᑐᑦ ᑐᐊᕕᖅᑐᐊᓗᖕᓂᐅᓐᖏᑦᑐᖅ ᖁᓐᖏᐊᖑᔭᖅᑎᑕᐅᓪᓗᑎᒃ ᐱᕙᓪᓕᐊᕋᔮᖅᑐᓂ. ᓱᒃᑲᐃᑦᑐᓂ ᑕᕐᕆᔭᕐᖢᓂ, ᖁᓐᖏᐊᖅᑕᐅᔪᑦ ᐊᑯᓂᐅᒐᓗᐊᕐᖢᑎᑦ, ᓇᑲᑎᖅᑕᐅᓯᒪᓐᖏᒃᑲᓗᐊᖅᑎᓪᓗᒋᓪᓗ ᖃᓄᑐᐃᓐᓇᖅ ᐱᓕᕆᐊᖑᔪᑦ, ᐃᖏᕐᕋᔾᔪᓯᕆᔭᐅᔪᑦ, ᐱᕙᓪᓕᐊᔪᓪᓘᓐᓃᑦ, ᑐᐊᕕᓐᖏᐅᔭᕐᓗᓂ ᖁᓐᖏᐊᖑᔭᕐᓇᖅᐳᑦ ᑕᓚᕖᓴᒃᑯᑦ ᖁᓐᖏᐊᕈᓯᐅᒐᔪᒃᑐᓂ ᐊᑐᕐᓇᓂ.
ᐃᓱᒪᒃᑯᑦ ᓱᒃᑲᐃᑦᑐᓂ ᑕᓚᕖᓴᒃᑰᖅᑎᑦᑎᓂᕐᒥᒃ
ᐅᖃᖃᑎᒌᒃᑎᓪᓗᒋᒃ ᓄᐊᕐᒪᓐ ᑳᓐ ᐊᒻᒪ ᒐᑉᕆᐊᓚ ᒐᒥᔅ, ᒪᐃ 09, 2017
(ᓇᑲᑎᖅᑕᐅᓪᓗᓂ ᒐᑉᕆᐊᓚ ᒐᒥᔅᒧᓐ)
1970ᖑᑎᓪᓗᒍ, ᐃᓕᓐᓂᐊᖅᑐᓕᕆᓂᕐᒧ ᖃᐅᔨᓴᕈᑕᐅᔪᓂ ᐱᓕᕆᐊᓂ ᐊᐅᓚᑦᑎᔨᓄᑦ ᑐᑭᒧᐊᒃᑎᑦᑎᔨᐅᑎᓪᓗᒍ, ᓄᐊᕐᒪᓐ ᑳᓐ ᓄᑕᖅᑲᓂ ᐃᓕᓐᓂᐊᖅᑎᑦᑎᓂᕐᒧ ᑲᑎᒪᕐᔪᐊᕐᓂᐅᔪᓄ ᖃᐃᖁᔭᐅᓚᐅᕐᓯᒪᕗᖅ ᑐᓴᒐᒃᓴᓕᐅᖅᐸᖕᓂᕐᒥ ᐅᖃᐅᓯᖃᖅᑐᓂ. ᑕᒡᕗᖓ ᑲᑎᒪᕐᔪᐊᕆᐊᖅᑐᖃᑕᐅᓚᐅᕆᕗᑦ ᒥᔅᑐ ᕌᔾᔪᔅ, ᑳᑉᑎᓐ ᑲᐃᓐᖑᕉ ᐊᒻᒪ ᑕᐃᓐᓇ ᐊᕐᓇᖅ ᓯᓴᒥ ᐊᖅᑯᑖᓂ ᐃᖏᕐᕋᔪᓕᕆᔨᐅᔪᖅ. ᑕᒡᕙᓂ ᑲᑎᒪᕐᔪᐊᖅᑐᓂ ᖃᐃᖁᔭᐅᒃᑲᓐᓂᓕᓚᐅᕆᕗᑦ ‘ᖃᐅᓪᓗᖅᑐᖅ ᐃᒡᓗᕐᔪᐊᑉ ᑲᑎᒪᕐᔪᐊᖅᑎᑦᑎᓂᖏᑦ ᐃᓕᓐᓂᐊᓕᓵᖅᑐᓂ ᐱᔾᔪᑎᓕᖕᓂ’, ᓄᐊᕐᒪᓐ ᑳᓐ ᐅᐸᖃᑕᐅᓪᓗᓂ ᑐᓴᒐᒃᓴᓕᕆᔨᐅᖃᑎᒌᖕᓂ ᑲᑎᒪᔨᐊᓛᓃᖃᑕᐅᑎᓪᓗᒍ.
ᑕᒡᕙᓂ ᑲᑎᒪᕐᔪᐊᖅᑐᓂ, ᓄᐊᕐᒪᓐ ᑳᓐ ᐊᕕᒃᑐᖅᑕᐅᓯᒪᐅᖅᑐᓃᖃᑕᐅᓚᐅᖅᐳᖅ ‘ᓇᓗᓇᐃᒃᑯᑕᖃᕈᓯᕐᓂ ᐱᕙᓪᓕᐊᓂᐅᔪᑦ ᐅᑭᐅᖃᖅᑎᓪᓗᒋᑦ ᓯᕗᓪᓕᕐᓂ ᑕᓪᓕᒪᓂ’. 24ᓂ ᐅᑭᐅᖃᖅᑎᓪᓗᒍ ᐃᓕᓐᓂᐊᖅᑐᓕᕆᓂᕐᒥᒡᓗ ᖃᐅᔨᒪᔨᒻᒪᕆᐅᑎᓐᓇᒍ, ᑕᐃᒪᐃᓐᓂᖓᓄᓪᓗ ᐊᓯᒥᓂ ᓈᓚᑐᐃᓐᓇᐸᓗᒃᖢᓂ, ᐅᖃᖅᑐᖃᖦᖤᖅᐳᖅ, ‘ᐃᒪᐃᑦᑐᓂ ᐱᔾᔪᑎᓕᖕᓂ ᑕᕐᕆᔭᐅᓯᐅᓪᓗᐊᕋᑦᑕ.’ ᓄᐊᕐᒪᓐ ᐃᓱᒻᒪᒃᖢᓂ, ‘ᑕᒪᒃᑯᐊ ᐅᖃᐅᓯᕆᔪᓐᓇᑦᑎᐊᖅᑕᒃᑲᑦᑕᐅᖅ!’ ᑕᕐᕆᔭᐅᓯᐅᕐᓂᕐᒥᒃ ᖃᐅᔨᓇᓱᖃᑦᑕᓕᓚᐅᕐᒪᑦ ᖃᐅᔨᒪᓂᖃᐅᐸᓗᓕᓚᐅᕐᖢᓂᓗ ᑕᒡᕗᓐᖓᖅᑎᓪᓗᒍ. ᖃᐅᔨᒪᓪᓗᓂ ᑕᕐᕆᔭᐅᓯᐅᕆᐊᒃᓴᖅ ᐊᑭᑐᔪᐊᓘᓂᖓᓄᑦ - $1,000 1 ᒥᓂᑦᓕᒫᖅ - ᑕᐃᒪᓐᓇᑎᒋᐊᓗᒡᓗ ᑮᓇᐅᔭᖃᓐᖏᑦᑎᐊᕐᖢᑎᑦ. ᐊᓱᐃᓛᒃ ᓄᐊᕐᒪᓐ ᑕᒪᑐᒥᖓ ᐅᓂᒃᑲᐅᑎᐅᔭᖅᑎᓪᓗᓂᖓ ᐅᔾᔨᕆᔾᔫᒥᓕᓚᐅᖅᐳᖅ...
ᓄᐊᕐᒪᓐ
ᐃᒻᒪᖄ ᑕᕐᕆᔮᒃᓴᓕᐅᕈᓐᓇᖅᐳᒍᓐ. ᑕᓚᕖᓴᒃᑰᖅᑐᒃᓴᓕᐅᕐᖢᓂ ᐊᑭᑭᓐᓂᕐᓴᐅᔪᖅ ᑕᕐᕆᔮᒃᓴᓕᐅᕐᓂᕐᒥᒃ.’ 1970ᖑᑎᓪᓗᒍ ᑕᐃᒪᐃᓕᐅᓚᐅᕐᓯᒪᕗᖅ, ᑕᐃᖕᓇᓗ ᔮᐸᓃᓯᓄᑦ ᓇᒃᓴᑲᑕᒐᓕᐊᖅ ᓴᓇᔭᐅᓵᕐᓂᑰᑎᓪᓗᒍ 1968ᒥ. ᐃᖅᑲᐅᒪᓐᖏᓚᖓᓘᓐᓃᑦ ᑕᐃᔅᓱᒪᓂ ᖃᐅᔨᒪᓚᐅᕐᒪᖔᒃᑯ. ᓲᕐᓗᓕᑦᑕᐅᖅ ᓴᖅᑲᓕᐊᓯ ᖃᓪᓗᓈᓄᓐᖓᐅᓪᓗᓂ Betamaxᖑᓂᕋᖅᑕᐅᔪᒥᒃ ᐊᔾᔨᓕᐅᕈᑎᑖᕆᐊᖅᑐᓚᐅᕐᓯᒪᖕᒪᓐ, ᐃᒡᓗᓕᖕᒥᓘᓐᓃᑦ ᑕᓚᕖᓴᑕᖃᓐᖏᑎᓪᓗᒍ, ᑕᑯᓐᓂᕋᒥ ᕿᒥᕐᕈᐊᒐᕐᓃᑦᑐᓂ. ᐊᓱᐃᓛᒃ ᖃᓪᓗᓈᓄᓐᖓᐅᓪᓗᓂ ᓂᐅᕕᕆᐊᕐᖢᓂ ᐅᖃᓕᒫᒐᕐᒥᒃ ᑕᑯᔭᕕᓂᖓᓐᓂᒃ. ᐅᖃᓚᐅᖅᐳᖓ, ‘ᐊᔾᔨᓕᐅᕆᔪᓐᓇᖅᐳᒍᖅᑲᐃ, ᐊᑭᑭᓐᓂᕐᓴᐅᖕᒪᓐ.’ ᐅᖃᖅᑐᖃᖦᖤᕆᕗᖅ, ‘ᑭᓇᓕ ᑕᐃᒪᐃᓐᓇᔭᕐᒪᓐ?’ ᐅᕙᖓ ᑭᐅᓪᓗᖓ, ‘ᐅᕙᖓ, ᑕᐃᒪᐃᑦᑐᓐᓇᖅᑐᖓ.’ ᐊᓱᐃᓛᒃ ᐱᓕᕆᔪᒪᑐᐃᓐᓇᒧᑦ ᐊᔾᔨᓕᐅᕆᔪᒪᓕᓚᐅᖅᐳᖓ ᓄᑕᖅᑲᑦ ᐱᕈᖅᐸᓪᓕᐊᔾᔪᓯᖏᓐᓂ ᐱᕙᓪᓕᐊᔪᓕᕆᓂᕐᒥ $3,000ᓂ ᑮᓇᐅᔭᖅᑐᕈᑕᐅᔪᓂ ᑖᒃᑯᓄᖓ ᑲᑎᒪᔨᐊᓛᓄᑦ. ᑭᒃᑯᓗᒃᑖᓪᓗ ᐅᖃᓕᕐᖢᑎᓐ, ‘ᐊᑏᕋᐃᓐᓄᒃ, ᑕᐃᒪᐃᓕᕆᓐ!’
ᖃᐅᔨᒋᐊᓕᓚᐅᖅᐸᒃᑲ ᖁᕐᓱᖅᑐᓂ ᑕᓚᕘᕐᓯᐅᑎᓃᑦᑐᓂ, ᖃᐅᔨᓕᕐᖢᒋᓪᓗ ᑎᒥᐅᔪᑦ (Concorde) ᑳᓐᑯᐊᑦ ᑕᕐᕆᔭᐅᓯᐅᖅᑎᖏᑦ, ᓯᒃᑳᒍᒥ (ᐊᒥᐊᓕᑲᓂ) ᑎᑎᕋᕐᓯᒪᔪᑦ ‘ᑕᓚᕖᓴᓄ ᑕᕐᕆᔭᐅᑎᓕᐅᕈᑎᓄᓪᓗ ᐃᓚᒃᓴᑦ’ ᐊᑖᓃᖦᖢᑎᑦ. ᐅᖄᓚᕝᕕᒋᓪᓗᒋᑦ ᐅᖃᕐᖢᖓ, ‘ᑕᑯᒋᓐ...ᖃᐅᓪᓗᖅᑐᒥᒃ ᐃᒡᓗᕐᔪᐊᕐᒥ ᓴᓇᒐᒪ. ᖃᐅᓪᓗᖅᑐᖅ ᐃᒡᓗᕐᔪᐊᖅ ᑲᑎᒪᕐᔪᐊᖅᑎᑦᑎᖕᒪᑕ ᓄᑕᖅᑲᓂ ᐱᔾᔪᑎᓕᖕᓂ. ᐊᔾᔨᓕᐅᕆᔪᒪᒐᑦᑕ ᐃᓕᔅᓯᓐᓂ ᐊᐱᕆᔪᒪᕗᖓ ᐊᔾᔨᓕᐅᕈᑎᔅᓯᓐᓂ ᐊᑐᖅᑐᐊᕈᓐᓇᕐᒪᖔᑕ?’ ᐊᓱᐃᓛᒃ ᐊᖏᕐᖢᑎᓐ. ᐊᓱᐃᓛᒃ ᐅᕙᓐᓂᒃ ᐊᑐᖅᑐᐊᖅᑎᑦᑎᓚᐅᖅᐳᓐ ᓯᕗᓪᓕᖅᐹᑦᑎᐊᓂ ᓇᒃᓴᑲᑕᒐᕐᓂᖅᑐᓂ ᐊᔾᔨᓕᐅᕆᔾᔪᑎᓂ, ᐊᔾᔨᓕᐅᕈᑕᐅᓪᓗᓂ ᓂᐱᓕᐅᕈᑎᖃᕐᖢᓂᓗ. ᑭᓯᐊᓂ ᓂᐱᓕᐅᕆᔾᔪᑎᖓ ᐅᑎᖅᑕᖅᑎᑦᑎᔾᔪᑎᖃᓚᐅᓐᖏᓚᕐᓘᓐᓃᓐ, ᐊᔾᔨᓕᐅᕆᓯᒋᐊᕈᓂ ᐃᑲᕐᕋᐅᑉ ᓇᑉᐸᖓᓄ ᐊᔾᔨᓕᐅᕆᔪᓐᓇᕐᖢᓂ, ᐊᔾᔨᒃᓴᖓ ᐃᓱᓕᑐᐊᕈᓂ ᑭᓯᐊᓂ ᓱᑲᑎᑯᑖᒡᓗᒍ ᐅᑎᖅᑎᑦᑎᒐᒃᓴᐅᓪᓗᓂ ᐊᒡᒐᒧᓐ ᑲᐃᕙᑎᑲᑕᒋᐊᖃᖅᐸᒃᖢᒍ. ᐅᕝᕙᓘᓐᓃᑦ ᐊᔾᔨᓕᐅᖅᑕᐅᓯᒪᔪᑦ ᑲᐃᕙᑦᑎᓯᒪᔪᖁᑎᖏᑦ ᓇᒃᓴᑲᑕᒐᕐᒧᐊᓚᐅᕐᓗᒍ ᐊᖏᓂᕐᓴᐅᔪᒧ ᑕᕐᕆᔭᐅᑎᒧ ᐅᐃᔾᔮᖅᑎᑯᑖᒃᐸᒡᓗᒍ, ᐊᖏᓂᕐᓴᐅᔪᒧ ᑕᕐᕆᔭᐅᑎᒧ ᐅᑎᒧᐊᑲᑕᒃᑎᑦᑐᓐᓇᖅᐸᒃᖢᒍ. ᑕᐃᒪᓐᓇ ᓲᕐᓗ ᓯᕗᓪᓕᕕᓂᑦᑎᓐᓄᐊᖅᑰᔨᕙᒃᖢᑕ. ᓱᓇᐅᕝᕙ ᐊᖏᓂᕐᓴᒥᒃ ᑕᕐᕆᔭᐅᑎᖃᕐᓂᕐᖢᖓ. ᑕᒪᕐᒥᓗᒃᑖᖅ ᐊᖏᕐᕋᐅᑎᓪᓗᒋᑦ, ᐃᒡᓗᕋᓛᓐᓄᐊᕈᑎᓪᓗᒋ ᒪᑐᐃᖅᑎᕐᖢᒋᑦ ᒪᓕᒃᑕᒐᖏᑦ ᐅᖃᓕᒫᒐᖏᑦ ᕿᒥᕐᕈᓇᑦᑎᐊᕐᖢᒋᑦ, ᑕᒪᐃᓐᓂᒡᓗ ᑲᑉᐳᑎᔭᕆᐊᓕᑦ ᑲᑉᐳᑎᓪᓗᒋᑦ. ᑕᐃᒪᓐᓇᑦᑕᐃᓐᓇᑦᑎᐊᖅᑕᐅᖅ ᓴᖅᑲᓕᐊᓯ ᐱᓐᓂᕆᓪᓗᓂ. ᐊᔾᔨᓕᐅᕈᑎᑖᕆᓚᐅᖅᑕᓂ ᐴᕐᒥᓂ ᐲᔭᕋᒥᐅᒃ ᒪᓕᒃᑕᒐᑦ ᐅᖃᓕᒫᒐᑦ ᐅᖃᓕᒫᑦᑎᐊᕐᓂᕆᓪᓗᓂᒋᑦ, ᑲᑉᐳᑎᒐᓪᓗ ᑲᑉᐳᑎᒐᓇᒃᖢᓂᒋᑦ. ᐊᓱᐃᓛᒡᓕ ᐅᖃᓕᕐᖢᓂ, ‘ᓯᕗᓪᓕᕐᓄ ᑕᖅᑭᓄ ᐊᕐᕕᓂᓕᖕᓄ ᑕᕐᕆᔮᒃᓴᓕᐊᕆᔭᓕᒫᒃᑲ ᑕᕐᓴᖃᓐᖏᑦᑎᐊᖅᐸᓚᐅᖅᐳᓐ,’ ᖃᓄᐃᒻᒪᓪᓗ ᑕᐃᒪᐃᓐᓂᖓᓄ ᖃᐅᔨᔪᓐᓇᕋᓂ, ᑭᓯᐊᓂ ᐊᑕᐅᓯᐊᖅ ᐅᔾᔨᕆᖦᖤᓕᖅᐳᖅ ᐅᖃᓕᒫᒐᕐᓂ ᐃᑭᑦᑕᖅᑐᖅᑕᖃᕐᓂᖓᓄᑦ. ᐃᑭᖦᖢᒍ ᓱᓇᐅᕝᕙ ᐊᔾᔨᓕᐅᕆᔭᖏᑦ ᑕᕐᓴᖃᑦᑎᐊᓕᕐᖢᑎᓐ.
ᓄᐊᕐᒪᓐ ᖃᐅᔨᒐᒥ ᓇᒃᓴᑲᑕᒐᕐᓂᖅᑐᑦ ᐊᑐᒐᒃᓴᐅᓂᖏᓐᓄᓐ, ᑎᓴᒪᓂ ᐅᑭᐅᓕᒃ ᐃᕐᓂᓂ ᔭᐃᓴᓐ ᒪᓕᑲᑕᓕᓚᐅᖅᐸᖓ, ᑕᕐᕆᔭᐅᓯᐊᕆᕙᓪᓕᐊᖏᓐᓇᕐᖢᓂᐅᒃ ᑭᓯᐊᓂ ᐃᓱᓕᔾᔪᔾᔨᒐᒥ ᐃᑲᕐᕋᐅᑉ ᓇᒃᐸᖓᓐᓂᒃ. ᓄᐊᕐᒪᓐ ᔭᐃᓴᓐᒥᒃ ᒪᓕᑲᑕᑐᐃᓐᓇᕐᖢᓂ ᐃᑲᕐᕋᐅᑉ ᓇᑉᐸᓕᒫᖓᓄ ᐊᓯᐊᓄ ᑕᕐᕆᔭᐅᓯᐅᕆᒋᐊᓚᐅᓐᖐᓐᓇᕐᖢᓂ. ᓯᕗᓪᓕᖅᐹᑦᑎᐊᕐᒥ ᓄᐊᕐᒪᓐ ᐊᔾᔨᓕᐅᕆᔨᐅᓚᐅᖅᐳᖅ, ᑕᐃᑲᓂ ᐆᒃᑐᖅᑕᐅᔪᓂ ᑕᒪᕖᓴᒃᑯᑦ ᓴᖅᑭᔮᖅᑎᑕᐅᔪᒃᓴᐅᔪᓂᑎᑐᑦ, ᒍᐊᑕᓐ ᐊᔾᔨᓕᐅᕆᔨᐅᓚᐅᖅᐳᖅ ᐃᓕᖅᑯᓯᕆᔭᐅᒐᔪᖕᓂᕐᓴᓂ ᐊᑐᕐᖢᓂ ᑕᕐᕆᔭᐅᓯᐅᕐᖢᓂ. ᓄᐊᕐᒪᓐ ᐅᕙᓐᓄ ᐅᖃᓕᓚᐅᖅᐳᖅ ᐃᖅᑲᐅᒪᓚᐅᕐᓂᖓᓄ 24ᓂ ᐅᑭᐅᖃᖅᑎᓪᓗᒍ, ᑎᓴᒪᓂ ᐅᑭᐅᓕᖕᒥᒃ ᐃᕐᓂᖓᓐᓂᒃ ᐊᔾᔨᓕᐅᕆᑎᓪᓗᒍ, ᓯᕗᓪᓕᖅᐹᒥᒎᖅ ᑕᕐᕆᔭᐅᓯᐅᖅᑎᓪᓗᒍ, ᑕᕐᕆᔭᐅᓯᐅᕐᓂᕐᒧ ᐃᓕᖅᑯᓯᕆᕙᒃᑕᕕᓂᖏᑦ ᐊᓯᔾᔨᓚᐅᕐᓂᖏᓐᓄᑦ.
ᓄᐊᕐᒪᓐ
ᑕᕐᕆᔮᒃᓴᓕᐅᕈᑎᑖᕆᐅᓚᐅᕐᓯᒪᕗᖓ, ᐃᑲᕐᕋᐅᒻ ᓇᑉᐸᖓᓄ ᑕᕐᕆᔮᒃᓴᒃᓴᓕᕐᖢᒍ. ᖃᐅᔨᒪᓪᓗᖓ ᑕᒡᕙ ᐃᑲᕐᕋᐅᒻ ᓇᑉᐸᖓᓄ ᑕᕐᕆᔮᒃᓴᓕᐅᕈᓐᓇᕐᓂᓐᓄ, ᐊᔪᕈᓐᓃᕐᓴᕈᑎᒋᔪᓐᓇᕐᓂᓐᓄᓪᓗ. ᐊᑐᓚᐅᕐᓗᒍ, ᐅᑎᒧᑦ ᑲᐃᕙᑎᑦᑐᓐᓇᕐᓂᓐᓄᑦ ᖃᐅᔨᒪᓪᓗᖓ, ᐊᑐᒃᑲᓐᓂᕈᓐᓇᕐᓂᓐᓄᑦ, ᐅᑎᒧ ᑲᐃᕙᑎᒃᑲᓐᓂᕐᒥᓗᒍ, ᐊᑐᒃᑲᓐᓂᓕᕐᒥᓗᒍ. $13 ᐊᑭᖃᓚᐅᖅ ᖃᐅᔨᒪᓪᓗᖓᓗ ᑕᐃᓐᓇ $13 20ᖏᕐᓱᕐᓗᒍ ᐊᑐᕈᓐᓇᕐᓂᓐᓄᑦ ᐊᑭᓕᒃᑲᓐᓂᓐᖏᑦᑎᐊᕋᓗᐊᕐᓗᒍ. ᐊᓱᐃᓛᒃ ᓯᕗᓪᓕᖅᐹᒥ ᐊᔾᔨᓕᐅᕆᑐᐃᓐᓇᓚᐅᖅᐳᖓ ᐃᑲᕐᕋᐅᑉ ᓇᑉᐸᖓᓄ. ᐊᔾᔨᓕᐅᕈᑎᒃᑯᑦ ᕿᒥᕐᕈᐊᑲᑕᑐᐃᓐᓇᕐᖢᖓ ᐃᑲᕐᕋᐅᑉ ᓇᑉᐸᖓᓄᑦ.
ᐊᔾᔨᓕᐅᕈᑎᒃᑯᑦ ᕿᒥᕐᕈᐊᖑᔭᕐᖢᖓ...ᑖᓐᓇ ᐊᔾᔨᓕᐅᕈᑎ ᐊᑐᕐᖢᒍ, ᐃᓱᒪᓐᖏᑦᑎᐊᕐᖢᖓ, ᐃᑲᕐᕋᐅᑉ ᓇᑉᐸᖓᓄᑦ. ᐱᔮᕆᓇᖓᓗ, ᑐᕌᖅᑎᑐᐃᓐᓇᕐᖢᒍ ᐃᓄᖕᒧᑦ ᑎᓴᒪᓂ ᐊᕐᕌᒍᖃᖅᑐᒧᑦ - ᐅᔾᔨᕆᔾᔫᒥᓕᓚᐅᖅᐳᖓ ᑲᒪᓇᐸᓗᖕᓂᖓᓄᑦ ᑖᓐᓇ ᐃᓄᑯᓗᒃ ᐊᔾᔨᓕᐅᖏᓐᓇᓕᕋᒃᑯ ᐃᑲᕐᕋᐅᑉ ᓇᑉᐸᖓᓄᑦ. ᖃᐅᔨᓕᕐᖢᖓᓗ ᐱᓪᓚᑦᑖᖅᑐᒥᒃ ᐊᔾᔨᓕᐅᕆᓂᓐᓄᓐ. ᐅᔾᔨᕐᓇᓪᓚᕆᒃᖢᓂᓗ ᐱᓪᓚᑦᑖᕐᓂᖓᓄᑦ ᑕᕐᕆᔮᒃᓴᑐᐃᓐᓇᐅᓇᓂ...ᐱᓗᐊᖅᑐᒥ ᒫᓐᓇᑲᐅᑎᒋ ᑕᐅᑐᒍᓐᓇᓚᐅᕋᒃᑯ. ᐃᕐᖐᓐᓇᕐᓗ ᖁᓐᖏᐊᒃᑲᓐᓂᕈᓐᓇᕆᓪᓗᒍ, ᓲᕐᓗᓕ ᐃᑲᕐᕋᐅᒻ ᓇᒃᐸᖓᓂᐅᖅᑲᐅᔪᖅ ᐊᑐᖅᑲᐅᔭᕗ ᐊᑐᒃᑲᓐᓂᓕᕐᖢᑎᒍᓐ. ᐅᕙᓐᓄ ᐃᓱᒪᓕᕐᖢᖓ, ‘ᖁᓐᖏᐊᕐᖢᒍ ᐊᔾᔨᖃᑐᐃᓐᓇᖅᑰᔨᕗᖅ ᐊᑐᖅᑲᐅᔭᓐᓂ. ᖃᓄᐃᒻᒪᒃᑭᐊᖅ ᐱᓪᓚᑦᑖᖅᑰᔨᕙ? ᐆᒃᑑᑎᒋᓐᖑᐊᕐᖢᒋᑦ ᐊᓯᖏᓐᓄ ᑕᕐᕆᔮᒃᓴᓕᐊᕆᖃᑦᑕᕐᓯᒪᔭᑦᑎᓐᓄ ᓱᓕᓪᓚᑦᑖᖅᑰᔨᕙᓐᖏᑦᑐᓄ. ᑕᐃᒃᑯᐊᓕ ᓇᑭᓐᖔᖔᖅᑐᕕᓂᐅᖅᑰᔨᕙᒃᖢᑎᑦ. ᑖᓐᓇᓕ ᐊᔾᔨᓕᐊᕆᔭᕋ ᔭᐃᓴᓐᓚᕆᐅᓪᓗᓂ ᐱᓪᓚᑦᑖᖅᑎᓪᓗᒍ.
ᑕᕐᕆᔮᒃᓴᓕᐅᖅᑎᓪᓗᑕᓕ ᐃᒪᐃᖏᓐᓇᐅᔭᕋᓗᐊᕐᒪᓐ, ᑕᑯᒃᓴᐅᔪᑦ ᐱᔾᔪᑎᖃᖅᐳᓐ ᓄᑕᕋᓛᕐᓂ, ᑕᑯᒃᓴᐅᔪᓐ ᐱᔾᔪᑎᖃᖅᐳᓐ ᐃᓕᓴᐃᓂᕐᒥᒃ, ᑕᑯᒃᓴᐅᔪᑦ ᐱᔾᔪᑎᖃᖅᐳᓐ ᓄᑕᖅᑲᓂ, ᑕᑯᒃᓴᐅᔪᑦ ᐱᔾᔪᑎᖃᖅᐳᓐ ᒪᑯᓂᖓ. ᑕᐃᒪᐃᓐᓂᖓᓄ ᓴᖅᑭᑎᑦᑎᓂᕐᒧᑦ ᐃᓱᒪᔾᔪᓯᕋ ᐊᓯᓐᖑᓚᐅᖅᐳᖅ. ᓱᓕ, ᐱᔮᕆᓇᖓ. ᐊᔾᔨᓕᐅᕆᑎᓪᓗᖓ ᐃᑭᑉᐸᒃᖢᒍ ᖃᒥᑉᐸᒃᖢᒎᓚᐅᓐᖏᓐᓇᒃᑯ, ᓄᖅᑲᖅᑕᑲᑕᓐᖏᖦᖢᖓ ᓇᑲᑎᕆᑲᑕᓐᖏᖦᖢᖓ ᐃᓱᒪᓕᐅᖅᐸᓪᓕᐊᓐᖏᖦᖢᖓᓗ. ᐃᖏᕐᕋᑏᓐᓇᑐᐃᓐᓇᕐᖢᒍ ᐃᑲᕐᕋᐅᑉ ᓇᑉᐸᓕᒫᖓᓄᓐ. ᓇᒧᕈᓘᔮᓘᓐᖏᖦᖢᖓᓗ, ᓄᒃᑎᖅᑕᖅᑎᑲᑕᓐᖏᖦᖢᒍᓗ ᔭᐃᓴᓐᒥᒃ ᐊᓈᓇᖓᓐᓄᓐ ᐊᓈᓇᖓᑦᑕ ᐅᖃᓪᓚᒡᕕᒋᓕᕌᖓᒥᐅᒃ, ᐊᒻᒪᓗ ᓇᔭᖓᓐᓄ ᓅᑎᖔᖅᐸᓐᖏᖦᖢᒍ ᓇᔭᖓᓐ ᓂᓪᓕᐊᓕᕌᖓᓐ, ᐃᒐᓛᒃᑯᓪᓘᓐᓃ ᐅᔪᐊᕆᐊᕌᖓᑦ. ᖃᓄᑐᐃᓐᓇᑦᑎᐊᖅ ᐊᔾᔨᓕᐅᕆᑎᓪᓗᑕ ᐃᓕᖅᑯᓯᕆᕙᒃᑕᑦᑎᓐᓂ ᐃᓱᒪᓐᖏᑦᑎᐊᕐᖢᖓ, ᓲᕐᓗ ᐊᐃ, ᑕᒪᕐᒥᓗᒃᑖᕌᓗᒃ ᐊᕙᑎᐊᓃᑦᑐᑦ ᓴᖅᑭᑎᓐᓇᓱᒃᑕᐃᓐᓇᕆᓗᒋᓘᓐᓃ. ᐃᓱᒪᕐᓱᕐᖢᖓ ᑖᓐᓇᑦᑕᐃᓐᓇᖅ ᐃᓅᔪᖅ ᑐᕌᕐᓯᒪᕝᕕᒌᓐᓇᕐᖢᒍ ᐃᑲᕐᕋᐅᒻ ᓇᑉᐸᓕᒫᖓᓄᑦ. ᐊᔾᔨᒃᓴᖅ ᐅᑎᒧᓐ ᑲᐃᕙᑎᓐᓇᒃᑯ ᑕᑯᓕᕐᖢᖓ - ᐱᓪᓚᑦᑖᖅᑲᐅᔪᓂ ᐊᑐᓪᓚᑦᑖᖅᑰᔨᓕᕐᖢᖓ - ᑲᒪᑦᑎᐊᒻᒪᕆᓕᓚᐅᖅᐳᖓ. ᐅᕙᓐᓄ ᐅᖃᒻᒪᕆᓕᕐᖢᖓ, ‘ᑖᓐᓇ ᓲᕐᓗ...ᖃᐅᔨᕖᓐ...ᐅᔾᔨᕆᓚᐅᕐᓯᒪᓐᖏᑦᑎᐊᖅᑕᕋ.’
ᒐᑉᕆᐊᓚ
ᓲᕐᓗᓕ ᐊᑐᓚᐅᖅᑕᓐ - ᑕᕐᕆᔭᐅᓯᐅᕐᖢᒍ - ᐊᖏᒡᓕᒋᐊᖅᑰᔨᓪᓗᓂ? ᐅᕝᕙᓘᓐᓃ ᐊᖏᓐᓇᖅᑐᒃᑰᕐᓯᒪᓪᓗᓂ?
ᓄᐊᕐᒪᓐ
ᓲᕐᓗᓕ ᐃᓄᖕᒥᒃ ᖁᓐᖏᐊᕐᖢᖓ, ᕿᑐᕐᖓᓐᓂᒃ - ᐊᔾᔨᓕᐅᕈᑎᒃᑰᕋᓗᐊᕐᖢᓂ, ᐅᕙᖓᐅᓐᖏᑦᑐᖅ ᓇᓗᓇᓐᖏᒃᑲᓗᐊᕐᖢᓂ, ᓲᕐᓗᓕ ᑕᐃᑲᓃᖦᖢᖓ ᐃᑲᕐᕋᐅᑉ ᓇᒃᐸᖓᓄᖅ, ᓲᕐᓗᓕ ᑕᒡᕙᓂᑦᑕᐃᓐᓈᕐᖢᖓ ᐃᑲᕐᕋᐅᑉ ᓇᒃᐸᖓᓃᖃᑕᐅᖅᑰᔨᓪᓗᖓ, ᓲᕐᓗᓕ ᐊᓯᐊᖑᓪᓗᖓ ᐃᓄᒃᑲᓐᓂᐅᖃᑕᐅᖅᑰᔨᓪᓗᖓ. ᑕᐃᒪᓐᓇ ᐃᒃᐱᒋᔭᓚᐅᖅᑕᖏ ᐃᒃᐱᒋᖃᓯᐅᑎᖅᑰᔨᓕᕐᖢᒋᑦ ᐱᓪᓚᑦᑖᖅᑐᒦᖅᑰᔨᓕᕐᖢᖓ ᑕᒡᕙᓃᖃᑕᐅᖅᑰᔨᓕᕐᖢᖓ.
ᑕᐅᑐᓐᖑᐊᓐᖓ ᓲᕐᓗ ᑕᐅᑐᒃᖢᒋᑦ ᐅᕙᓐᓂᒃ ᓈᓚᒃᑐᑎᓐ. ᐅᕙᓐᓂᒃ ᓇᖕᒥᓂᖅ (ᓄᐊᕐᒪᓐᒥᒃ) ᑕᑯᓚᐅᕋᑎᑦ, ᖃᕆᑕᐅᔭᕐᒧᑦ ᑕᑯᒋᐊᓚᐅᕋᑎᑦ, ᐃᓕᖕᓂᒃ (ᒐᑉᕆᐊᓚ) ᖁᓐᖏᐊᕐᖢᑎᓐ ᐃᑲᕐᕋᐅᒻ ᓇᒃᐸᖓᓄ. ᐅᑎᒧ ᑲᐃᕙᑎᖦᖢᒍ ᖁᓐᖏᐊᖅᑎᒃᑲᓐᓂᓕᕐᖢᒋᓐ. ᐃᒃᐱᒍᓱᒐᔭᖅᐳᑎᑦ ᓲᕐᓗ ᐊᑐᓚᐅᕐᓯᒪᔭᕕᓂᕐᓂ ᐊᑐᒃᑲᓐᓂᕐᖢᑎ. ᓲᕐᓗᓕ ᑭᓇᒧᒃᑭᐊ ᐃᓅᓯᓪᓚᑦᑖᓐ ᐃᑲᕐᕋᐅᒻ ᓇᑉᐸᖓᓄ ᐅᑎᖅᑎᑕᐅᓪᓗᓂ, ᐃᑲᕐᕋᐅᒻ ᓇᒃᐸᖓᓄ ᐅᑎᖅᑎᑦᑐᓐᓇᕐᖢᒍ. ᒪᕐᕉᖕᓄ ᒥᓂᑦᓯᓄ ᐅᑎᒧ ᑲᐃᕙᑎᓚᐅᕐᖢᒍ ᑕᕐᕆᔭᒃᑲᓐᓂᓕᕐᖢᒍ, 2 ᒥᓂᑦᓯᓂ ᐊᑐᖅᑲᐅᔭᑎᑦ ᐊᑐᒃᑲᓐᓂᖅᑰᔨᓕᕐᓗᒋᑦ, ᓲᕐᓗᓕ ᑎᒥᕕ ᐃᓗᐊᒍᓐ, ᑎᒥᕕᓐ ᓯᓚᑖᓂ - ᐊᕙᓗᓯᒪᑐᐃᓐᓇᕐᖢᓂ ᐃᓕᓯᒪᔭᓐᓂᒃ. ᐊᒻᒪ ᐊᔾᔨᖃᓐᖏᑦᑎᐊᖅᑐᒥᒃ, ᐊᓯᐊᒍᑦ ᐱᑕᖃᕋᔭᓐᖏᑦᑎᐊᖅᑐᒥᒃ, ᐱᕕᖃᓕᕈᑕᐅᓪᓗᓂ ᐃᓱᒪᒃᓴᕐᓯᐅᕈᑎᓕᐅᕈᑕᐅᓪᓗᓂᓗ ᑕᒪᓐᓇ ᐊᔾᔨᓕᐅᕆᔾᔪᓯᐅᔪᓐᓇᖅᑐᖅ.
ᓄᑕᖅᑲᓂ ᐱᔾᔪᑎᓕᖕᓂ ᑭᖑᓕᕇᒃᑐᓂ ᐊᔾᔨᒃᓴᓕᐅᖃᑦᑕᖅᑐᕕᓂᐅᓪᓗᖓ, ᖃᐅᔨᑲᐅᑎᒋᓕᓚᐅᖅᐳᖓ ᖃᓄᑐᐃᓐᓇᖅ ᑕᕝᕙᓐᖔᖅᑐᑦ ᐊᔾᔨᓕᐊᕆᔭᑦ, ᓲᕐᓗᓕ ᑕᕐᕆᔮᒃᓴᓕᐊᖑᓯᒪᖅᑰᔨᓐᖏᓚᑦ. ᐊᒻᒪᓗ...ᓯᕗᓪᓕᕐᒥ ᐃᓱᒪᓚᐅᕋᓗᐊᕐᖢᖓ ᐅᕙᓐᓂᒃ ᐱᔾᔪᑎᖃᓐᖏᑦᑎᐊᕐᓂᖓᓄᑦ. ᔭᐃᓴᓐ ᐊᔾᔨᓕᐅᖏᓐᓇᑐᐊᕈᒃᑯ ᓲᕐᓗᓕ ᐊᔾᔨᓕᐅᕈᑕᐅᒻ ᐃᓚᒃᓴᕆᑐᐃᓐᓇᖅᑖᖓ. ᑭᓯᐊᓂ ᑭᖑᓂᐊᒍᑦ ᑐᑭᓯᓕᓚᐅᖅᐳᖓ - ᑕᕐᕆᔭᒐᓕᐅᑲᑕᐃᓐᓇᓕᕋᒪ ᑕᐃᒪᓐᓇ ᐊᑕᐅᓯᐊᕐᓇᖓ, ᑕᐃᖃᑦᑕᓕᓚᐅᕐᖢᒋᑦ ‘ᐊᔾᔨᖁᑎᑦ’ - ᑭᓇᑐᐃᓐᓇᕐᒥᒃ ᐊᕙᓗᑖᖅᑎᑦᑎᑐᐃᓐᓇᓐᖏᓚᖓ, ᑭᓯᐊᓂ ᑕᐃᓐᓇ ᐊᔾᔨᓕᐅᖅᑕᕋ, ᐊᓯᖏᓪᓘᓐᓃᑦ, ᑕᑯᓇᔭᕐᓂᖓᓐᓄᑦ ᑖᔅᓱᒥᖓᑐᐊᖑᓐᖏᑦᑐᖅ ᐊᔾᔨᓕᐅᖅᑕᐅᔪᒥᒃ - ᐊᑯᓂᐅᓂᖃᕐᓗᓂ 5 ᒥᓂᑦᓯᓂ ᐃᑲᕐᕋᐅᓪᓘᓐᓃ ᓇᒃᐸᖓᓄᑦ ᐅᕝᕙᓘᓐᓃ ᐃᑲᕐᕋᓄ ᑕᓪᓕᒪᓄ - ᑭᓯᐊᓂ ᐊᓯᔾᔨᓚᐅᕐᒪᑦ ᖃᓄᖅ ᑖᓐᓇ ᐊᔾᔨᓕᐅᕆᔭᕋ ᑕᐅᑐᖕᒪᖔᒍ. ᖃᓄᑭᐊᖅ ᑖᓐᓇ ᐃᓄᒃ ᐊᕐᓇᐅᔪᖅ ᐊᖑᑕᐅᔪᕐᓘᓐᓃᑦ ᐅᕙᖓᓗ, ᑕᒡᕙᓂᑦᑕᐃᓐᓇᐅᖅᑰᔨᓕᕐᖢᑕ. ᓲᕐᓗᓕ ᖃᓄᑭᐊᖅ ᐱᑦᑎᐊᕈᓐᓇᕐᓂᕐᓴᐅᓪᓗᒍ ᐱᑦᑎᐊᓐᖏᓐᓂᕐᓴᐅᔪᓐᓇᕐᖢᒍᓘᓐᓃᑦ. ᐅᕝᕙᓘᓐᓃᑦ ᐊᔾᔨᓕᐅᕆᔪᓐᓇᕐᖢᒍ ᑭᒃᑯᑐᐃᓐᓇᑦ ᕿᒥᕐᕈᐊᖅᑐᑦ ᐃᖢᐊᕐᓴᕐᓂᕐᓴᐅᓕᖅᑎᓪᓗᒋᑦ.
ᑕᐃᒪᓐᓇ ‘ᐊᑐᐊᒐᖃᓐᖏᓪᓗᓂ ᐊᔾᔨᓕᐅᕆᓂᖅ’, ᐊᔾᔨᖃᓐᖏᖦᖢᓂ ‘ᐊᑐᐊᒐᖃᓐᖏᓪᓗᓂ ᐱᕕᖃᖅᑎᑦᑎᓂᕐᒥᒃ’, ᐅᕝᕙᓘᓐᓃᑦ ‘ᐊᕙᓗᖃᖅᑎᑦᑎᓂᖅ’, ᐊᒻᒪ ‘ᑕᐃᒎᓯᖃᖅᑎᑦᑎᓂᖅ’, ᐊᒻᒪ ‘ᐊᑐᐊᒐᖃᓐᖏᓪᓗᓂ ᓴᓇᕐᕈᑎᖃᕐᓂᖅ’, ᐊᔾᔨᖃᕐᓂᖏᓐᓄᑦ ‘ᐊᑐᐊᒐᖃᓐᖏᑦᑐᓂ ᐃᓱᒪᓕᐅᕐᓂᕐᒥᑦ’. ᓲᕐᓗᓕ ᕿᒥᕐᕈᓇᒃᑕᐅᒻᒪᕆᓐᖏᓪᓗᓂ, ᑕᐅᑐᒃᑕᐅᑐᐃᓐᓇᕐᓗᓂ. ᑕᐅᑐᒃᑑᑉ ᐱᓕᕆᐊᒃᓴᑐᐊᕆᓪᓗᓂᐅᒃ ᑕᐅᑐᖕᓂᖅ. ᑕᐅᑐᒃᑐᖅ ᐃᖅᑲᖅᑐᐃᓇᓂ, ᐃᓱᒪᓕᐅᕋᓂ, ᓇᐃᒡᓕᒋᐊᖅᑎᑦᑎᓇᓂ, ᐅᕝᕙᓘᓐᓃᑦ ᐃᓱᒪᔾᔪᓯᓕᕆᓇᓂ. ᑕᐅᑐᒃᑐᖅ ᐃᓄᑐᐃᓐᓇᐅᓪᓗᓂ, ᐊᑕᐅᑦᑎᒃᑯᓪᓗ, ᐊᔾᔨᓕᐅᕆᔨᑐᐃᓐᓇᖅᑎᑐᑦ ᐃᖅᑲᖅᑐᐃᓐᖏᑦᑎᐊᕐᖢᓂ. ᓲᕐᓗ ᐃᓄᑐᐃᓐᓇᖅ ᐃᖅᑲᖅᑐᐃᔪᓐᓇᓐᖏᑦᑐᖅ. ᑐᑭᖓ ᑕᐃᒪ, ᖃᓄᑐᐃᓐᓇᖅ ᐃᓄᑐᐃᓐᓇᐅᒻ ᐃᒃᐱᒋᔭᖓ ‘ᐊᑐᐊᒐᖃᐅᕋᓂ.’